Haani luumistarõ

Kavvõsttüü um viimätsel aol saanu hariligus tüütämise moodus väega palľodõ inemiisi ja ütisüisi jaos. Mi olõ kavvõsttüüd tennü jo aastit. Uma kogõmusõ perrä säimi valmis ka Haani luumistarõ, et pakku’ ütehnhaardjat ja härgütäjät kavvõsttüükeskkunda kõiki jaos, kiä otsva’ vaeldust umalõ üttemuudu ja igäväle kontorilõ vai kodokontorilõ ni tahtva’ kokko sünnütä’ tüütegemise ja hingetõmbamisõ ao.

Hindäle, perrele, sõbrolõ, seltskunnalõ vai väikule miiskunnalõ

Haani Haani luumistarõ um Haani luuduspargi mäki pääl ni um mukav ja kodonõ kavvõsttüükotus, kohe võit tulla’ ütsindä vai ütehn seldsilise, perre vai väiku miiskunnaga. Mi man võit olla’ ja tüüd tetä’ niikavva, ku esi’ tahat, tehnilidse’ riista’ ja võimalusõ’ umma’ tuu jaos olõmahn. Ku vaia, annami eräpoolõlda arvamist ni nõvvo ja api tuuga, midä esi’ häste mõistami – sisuluuminõ, inemiisiga läbikäümine, meediä, luumisväega tohtõrdus, käsitüü.

Tahat olla’ tasaligult ja hõngu haarda’, et umma väke tagasi saiaq? Um sul vaia aigo ja rahhu, et suur tüü valmis saia’? Otsit uma miiskunnaga vahtsit mõttit tõistmuudu keskkunnahn vai tahat midägi mano oppi, saiaq vahtsit kogõmuisi ja tutvit? Või-olla’, et sa olõ-õi kunagi käünü Vanal-Võromaal ja Haanihn? Tahtmisõ’ ja vajahusõ’ umma’ esisugumadsõ’ ni mi paku õkva tuud, miä sul vaia um.

Tegüsüs ja kõrdalännü tüütegemine

Rahu ja vaikus, vabahus ja luumisvägi, hindä kokkovõtminõ ja joudminõ palľo är tetä’ – luudusõhn ollõhn um elol ja tüütegemisel tõõnõ vunk. Haanimaal um seletämäldä vägi, miä mõotas inemise hinge ja ihho, and vahtsõt kaemist elolõ ja ilmalõ!

Haani luumistarõ um mukav ja lämmi kotus. Kööginukahn um olõmahn kõik, miä vaia, et esi’ süvvä’ tetä’. A ku tahat tuust kohustusõst prii olla’, sõs mi lähkühn um umbõlõ hää kohvitarõ Suur Muna – tunnõt uma meksä ja põnõva söögi perrä, miä tetäs mi kandi söögikraamist. Lisas saami sullõ vai su miiskunnalõ söögi tüütarrõ telli’. Kohvi ja tsäid, ka mi kandi kasvõst, võit tetä’ nii palľo, ku kulus. 

Mukav olõminõ, põnõva’ lisavõimalusõ’

Luumistarrõ mahus kooni säidse inemist: tõõsõ kõrra suurõhn magamistarõhn um lagja katõ inemise säng ja väikumbahn tarõhn kats eräle sängü. Edimädse kõrra pääl um sohva katõ inemise jaos (kae’ pilte gallõriist). Ku vaia, saami panda’ lisasängü vai -madradsi nii edimädse ku ka tõõsõ kõrra pääle. Mõsutarõ (kemmerg ja duss) um suur ja mukav. Lisas um viil palľo võimaluisi: sann, mudiminõ, erälde kontsõrt, mitmõsugumadsõ’ tüütarõ’, matkal käümine, sporditegemine, perimüskultuurist ossasaaminõ ni muu’ tegemise’ ja aoviidüse’ (kae’ viil altpuult). 

Tehnilidse’ võimalusõ’: ilmavõrk tulõ üle õhu (kibõhus kooni 40/10 MB/s) ja wifi-võrk tüütäs (ilm ja Telia veidü mõotasõ’ tuud, ku hää internet um), tüülavva pääl um palľo valgust, hellü saa kullõlda läbi Bluetooth'i egäst massinast, tepslit um küländ. Tüülavva pääle saa panda’ viil üte ekraani, pruuki’ saa pildipiljat, trükümassinat, papõrtahvlit, pakso viltpleiädsi tahvlit, istmispalli. Ku sul um vaia midägi, miä tahn kirähn olõ-õi, sõs julgõhe ütle’ meile ja kõnõlõmi läbi, kuis saa. Kimmähe saa!

Palľo mass:

luumistarõ pruukminõ kooni 3 in / 40 eur/päiv (üüses jäiehn hinna seehn)
luumistarõ pruukminõ lühküt aigo (nt seminar) / 20 eur/h (üüses jäiehn hinna seehn)
luumistarõ pruukminõ terve päiv / 100 eur/päiv (üüses jäiehn hinna seehn)

Ku tahat, saat kõgõ iist massa’ üte arvõga.

Kiroda’ mullõ: erkki@maailmad.ee